የሙስሊም ደም ጥብቅነት (ስምንተኛው ሐዲስ)

0
464

عَنْ ابْنِ عُمَرَ رَضِيَ اللَّهُ عَنْهُمَا، أَنَّ رَسُولَ اللَّهِ صلى الله عليه وسلم قَالَ: “أُمِرْت أَنْ أُقَاتِلَ النَّاسَ حَتَّى يَشْهَدُوا أَنْ لَا إلَهَ إلَّا اللَّهُ وَأَنَّ مُحَمَّدًا رَسُولُ اللَّهِ، وَيُقِيمُوا الصَّلَاةَ، وَيُؤْتُوا الزَّكَاةَ؛ فَإِذَا فَعَلُوا ذَلِكَ عَصَمُوا مِنِّي دِمَاءَهُمْ وَأَمْوَالَهُمْ إلَّا بِحَقِّ الْإِسْلَامِ، وَحِسَابُهُمْ عَلَى اللَّهِ تَعَالَى”

رَوَاهُ الْبُخَارِيُّ وَمُسْلِمٌ.

ከኢብኑ ዑመር(ረ.ዐ) እንደተወራው የአላህ መልእክተኛ(ሰ.ዐ.ወ) እንዲህ ብለዋል፡-‹‹ሰዎችን ከአላህ በስተቀር ሌላ አምላክ እንደሌለና ሙሐመድም የአላህ መልዕክተኛ መሆናቸውን እስኪመሰክሩ፣ ሰላትንም እስከሚሰግዱና ዘካንም እስኪያወጡ ድረስ እንድጋደላቸው ታዝዣለሁ፡፡ይህን ካደረጉ ከእስልምና አግባብ ውጪ ካልሆነ ደማቸውንና ገንዘባቸውን ከእኔ ጠበቁ፡፡ ሒሳባቸውም በአላህ ላይ ነው፡፡›› (ቡኻሪና ሙስሊም ዘግበውታል)

የሐዲሱ አስፈላጊነት

ይህ ሐዲስ ታላላቅ የእስልምና ሃይማኖት መሰረቶችን ያዘለ ፍፁም ታላቅ ሐዲስ ነው፡፡እነርሱም፡- ከአላህ በቀር በእውነት የሚመለክ ሌላ አምላክ እንደሌለና ሙሐመድ (ሰ.ዐ.ወ) የአላህ መልእክተኛ መሆናቸውን ከልብ መመስከር፣ሶላትን እንደታዘዘው አድርጎ መፈፀምና ዘካን ለሚገባቸው ሰዎች መስጠት ናቸው፡፡

የቃላቶችና ሐረጎች ፍቺዎች

  • ‹‹ታዝዣለሁ››፡- አላህ አዞኛል
  • ‹‹ሰዎችን››፡- ጣኦትን የሚያመልኩትና በአላህ ላይ የሚያጋሩትን
  • ‹‹ሰላትን እስኪሰግዱ››፡- በታዘዙት መሰረት ግዴታዋንና ሱናዎቿን ጠብቀው እስኪፈጽሙና በርሷ ላይ ዘውታሪ እስኪሆኑ
  • ‹‹ዘካንም እስኪያወጡ››፡- ከገንዘባቸው ግዴታ የሆነውን አውጥተው ለሚገባቸው ሰዎች እስኪሰጡ ድረስ
  • ‹‹ጠበቁ››፡- (የታዘዙትን በመፈጸማቸው) ከችግር ራሳቸውን ተከለከሉ፡፡
  • ‹‹ሂሳባቸው በአላህ ላይ ነው››፡- የውስጣቸውን መተሳሰብ የልባቸውን እውነት መገምገም የአላህ ብቻ ነው፡፡ ምክንያቱም ልብን የሚመለከት እርሱ ብቻ ነው፡፡

አጠቃላይ ትርጓሜ

ሁለቱን ሸሃደተይን (ምስክርነቶች) በምላስ ብቻ መናገር ገንዘብን ለመጠበቅ በቂ ነውን?ከብዙ መረጃዎች እንደተረጋገጠው የአላህ መልእክተኛ(ሰ.ዐ.ወ) ወደርሳቸው እስልምናን ፈልገው ከሚመጡት ሁሉ ሁለቱን ሸሃዳዎች ብቻ ይቀበላሉ፡ ደማቸውንም ጠብቀው እንደ ሙስሊም ይቆጥሯቸዋል፡፡

ቡኻሪና ሙስሊምን ዋቢ በማድረግ ከአቢ ሁረይራ(ረ.ዐ)እንደተዘገበው ደግሞ የአላህ መልእክተኛ (ሰ.ዐ.ወ) እንዲህ ብለዋል፡- ‹‹ከአላህ በስተቀር በእውነት የሚገዙት ሌላ አምላክ የለም ብለው እስከሚመሰክሩ ድረስ ሰዎችን እንድጋደላቸው ታዝዣለሁ፡፡ይህን ያደረገ ሰው ሃብቱንና ነፍሱን ከኔ ጠበቀ ሒሳቡም በአላህ ላይ ነው፡፡››

የሙስሊም ዘገባ ደግሞ እንዲህ ይላል ‹‹ከአላህ በስተቀር በእውነት የሚገዙት ሌላ አምላክ እንደሌለ እስኪመሰክሩና እኔ ይዠው በመጣሁት መልእክትም እስኪያምኑ ድረስ›› ይላል፡፡

ሁለቱን ሸሃዳዎች መናገር ብቻውን የሰውን ደምና ገንዘብ ይጠብቃል፡፡ሙስሊምም ያደርጋል፡፡ አንድ ሰው ሰላቱን ከሰገደ ዘካን ከሰጠ ደግሞ ለሙስሊሞች የሚገባው መብት ሁሉ ለርሱም ይኖረዋል፡፡ የሙስሊሞች ግዴታም በርሱ ላይ ይኖራል፡፡

            ተፈላጊው ኢማን

ተፈላጊው ኢማን ቁርጥ ያለ እምነትና የኢስላም መርሆችን ያለ ጥርጥር መቀበል እንደሆነ በርካታ ሐዲሶች በግልፅ ያመለክታሉ፡፡ ለኢማን ትክክለኝነት የሚቀርቡ የምሁራንን መረጃዎች በመጥቀስ ወደ ኢማን መድረስ ግዴታ አይደለም፡፡ ለኢማን ተቀባይነትም መስፈርት አይደለም፡፡የአላህ መልእክተኛ (ሰ.ዐ.ወ) በዚህና በሌሎችም ሐዲሶቻቸው እርሳቸው ይዘውት የመጡትን ማመን በቂ እንደሆነ አስተምረዋል፡፡ መረጃዎች ማወቅን መስፈርት አላደረጉም፡፡

           በተገቢው ሁኔታ እንጂ

አግባብ ከሚሆኑ ሁኔታዎች መሀል ሶላትን መስገድና ዘካን መስጠት ይጠቀሳሉ፡፡አንዳንድ ዑለማዎች ፆምንም እዚህ ውስጥ ያካትታሉ፡፡እንዲሁም አንድ ሙስሊም ግድያን የሚያስፈርድ ወንጀል መፈጸሙ ከነዚህ አግባቦች ውስጥ ይጠቀሳል፡፡ የአላህ መልእክተኛ (ሰ.ዐ.ወ)፡- ‹‹ከአላህ በቀር በእውነት የሚገዙት ሌላ አምላክ እንደሌለና እኔም የአላህ መልእክተኛ መሆኔን የሚመሰክር ሰው ከሶስት ምክንያቶች በአንዱ እንጂ ደሙ ፈጽሞ አይፈቀድም፡፡አግብቶ የሚያውቅ ሆኖ ሳለ ዝሙት የሚፈጽም፤ነፍስን ያጠፋ ሰው (ለማካካስ) እና  ዲኑን የተወና ከጀመዓ ጋር የተቋረጠ›› ብለዋል፡፡

           ሂሳባቸው በአላህ ላይ ነው

ምስጢርን የሚያውቅና ልቦናን የሚመረምር አላህ (ሱ.ወ) ብቻ ነው፡፡እውነተኛ ሙእሚን ከሆነ ጀነት ያስገባዋል፡፡ውሸታምና ለይዩልኝ ኢስላምን የተቀላቀለ (የተቀበለ) የሰለመ ከሆነ ደግሞ ከእሳት ዝቅተኛው ወለል ውስጥ የሚቀጣ ሙናፊቅ ይሆናል፡፡በዱኒያ ውስጥ የመልዕክተኛው (ሰ.ዐ.ወ) ኃላፊነት መግለፅና ማስታወስ ብቻ ነው፡፡ቡኻሪና ሙስሊም ውስጥ እንደተዘገበው የአላህ መልዕክተኛ (ሰ.ዐ.ወ) ለኻሊድ እንዲህ ሲሉ ነግረውታል‹‹እኔ የሰዎችን ልብ እንድመራመርና ሆዳቸውን እንድሰነጥቅ አልታዘዝኩም፡፡››

ከሐዲሱ የምንቀስመው ትምህርት

የሙስሊሞች ደምና ሃብታቸው እርም መሆኑን!

LEAVE A REPLY

Please enter your comment!
Please enter your name here