አላህን መፍራት (ክፍል 1)

0
2132

አላህን መፍራት (ኸውፍ ሚናሏህ) የዒባዳ ፍሬና አላማውም ጭምር ነው። ተቅዋ (አላህን መፍራት) በአንድ ሠውና በአላህ ቁጣ መካከል የሚኖር መከላከያ ነው። ይህ እንዲሆን የሚያደርገው ደግሞ ትክክለኛ የአላህ ፍራቻ ነው።

يَا أَيُّهَا النَّاسُ اتَّقُوا رَبَّكُمْ وَاخْشَوْا يَوْمًا لَا يَجْزِي وَالِدٌ عَنْ وَلَدِهِ وَلَا مَوْلُودٌ هُوَ جَازٍ عَنْ وَالِدِهِ شَيْئًا إِنَّ وَعْدَ اللَّهِ حَقٌّ فَلَا تَغُرَّنَّكُمُ الْحَيَاةُ الدُّنْيَا وَلَا يَغُرَّنَّكُمْ بِاللَّهِ الْغَرُورُ

“እናንተ ሰዎች ሆይ! ጌታችሁን ፍሩ። ወላጅም ከልጁ (በምንም) የማይጠቅምበትን፤ ተወላጅም እርሱ ወላጅን በምንም ጠቃሚ የማይሆንበትን ቀን ፍሩ። የአላህ ቀጠሮ እውነት ነውና። ቅርቢቱም ሕይወት አትሸንግላችሁ። በአላህም (መታገስ) አታላዩ (ሰይጣን) አያታልላችሁ።” (ሉቅማን 31፤33)

ቁርአንም ሆነ ሐዲሶች በማስጠንቀቅያ እንዲሁም ስለዕለት ቂያማና ስለሑኔታዎቿ በሚተርኩ አንቀፆች የተሞሉ ናቸው።

فَاعْبُدُوا مَا شِئْتُمْ مِنْ دُونِهِ قُلْ إِنَّ الْخَاسِرِينَ الَّذِينَ خَسِرُوا أَنْفُسَهُمْ وَأَهْلِيهِمْ يَوْمَ الْقِيَامَةِ أَلَا ذَٰلِكَ هُوَ الْخُسْرَانُ الْمُبِينُ لَهُمْ مِنْ فَوْقِهِمْ ظُلَلٌ مِنَ النَّارِ وَمِنْ تَحْتِهِمْ ظُلَلٌ ذَٰلِكَ يُخَوِّفُ اللَّهُ بِهِ عِبَادَهُ يَا عِبَادِ فَاتَّقُونِ

“ከእርሱ ሌላ የሻችሁትን ተገዙ። ከሳሪዎች ማለት እነዚያ በትንሣኤ ቀን ነፍሶቻቸውንና ቤተሰቦቻቸውን ያከሰሩ ናቸው። ንቁ! ይህ እርሱ ግልጽ ከሳራ ነው” በላቸው። ለእነርሱ ከበላያቸው ከእሳት የኾኑ (ድርብርብ) ጥላዎች አልሏቸው። ከበታቻቸውም ጥላዎች አልሏቸው። ይህ አላህ ባሮቹን (እንዲጠነቀቁ) በእርሱ ያስፈራራበታል። “ባሮቼ ሆይ! ስለዚህ ፍሩኝ።” (አል-ዙመር 39፤15-16)

ረሡል /ሰ.ዐ.ወ/ መጨረሻችን እንዳያስጠላ እንዲህ ያስጠነቅቁናል፡-

فوالله الذي لا إله غيره إن أحدكم ليعمل بعمل أهل الجنة حتى ما يكون بينه وبينها إلا ذراع فيسبق عليه الكتاب فيعمل بعمل أهل النار فيدخلها وإن أحدكم ليعمل بعمل أهل النار حتى ما يكون بينه وبينها إلا ذراع فيسبق عليه الكتاب فيعمل بعمل أهل الجنة فيدخلها  متفق عليه

“ከሱ ውጪ ሌላ ጌታ የሌለ በሆነው አላህ ይሁንብኝ አንደኛችሁ የጀነት ሠዎችን ስራ ይሰራና ለሞት አንድ ክንድ ያህል ሲቀረው የተደነገገው ይቀድመዋል ከዚያም የእሳት ሠዎችን ስራ ይሰራና እሳት ይገባል። አንድኛችሁ የእሳት ሰዎችን ስራ እየሰራ ይቆይና ለመሞት አንድ ክንድ ሲቀረው የጀነት ሰዎችን ስራ ይሰራና ጀነት ይገባል” (ቡኻሪና ሙስሊም)

በሌላ ሃዲስ ረሡል (ሰ.ዐ.ወ) አንዲህም ብለዋል:-

والله لو تعلمون ما أعلم لضحكتم قليلاً ولبكيتم كثيرًا وما تلذذتم بالنساء على الفرش ولخرجتم إلى الصعدات تجأرون إلى الله تعالى) رواه الترمذي(

“በአላህ ይሁንብኝ የማውቀውን ብታውቅ ኖሮ ትንሽ ስቃችሁ ብዙ ባለቀሳችሁ ነበር። እንዳችሁም በአልጋ ላይ ጨዋታ ደስተኛ አይሆንም ነበር። (ከዚህ ይልቅ) ወደ ሜዳዎች ወጥታችሁ ወደ አላህ አቤት ትሉ ነበር። (ቲርሚዚ)

በሌላ ዘገባም

شيبتني هود وأخواتها) رواه الترمذي(

“ሁድና አምሳያዎቹ አሸበቱኝ” (ቲርሚዚ)

እንዲሁም

ما وجدت منظرًا إلا والقبر أفظع منه

“እንደቀብር ያለ አስደንጋጭ ቦታ የትም አምሳያውን አላገኘሁለትም!”

ዑመር አንድ ቀን በጣም አለቀሱ:: በዚሁ ለቅሷቸውም ለህመም ተዳርገው ሰዎች ጠየቋቸው። ነገር ግን ለለቅሶና ለህመም የዳረጋቸው ሌላ ሳይሆን

إِنَّ عَذَابَ رَبِّكَ لَوَاقِعٌ

“የጌታህ ቅጣት በእርግጥ ወዳቂ ነው፤ (የማይቀር ነው)።” (አጥ-ጡር 52፤7) የሚለውን የቁርአን አንቀፅ በማዳመጣቸው ነበር።

አላህን የመፍራት ፍሬዎች

1.አላህን መፍራት ዕውቀት ለማግኘት ትልቁ መሳሪያ ነው።

إِنَّمَا يَخْشَى اللَّهَ مِنْ عِبَادِهِ الْعُلَمَاءُ إِنَّ اللَّهَ عَزِيزٌ غَفُورٌ

“አላህን ከባሮቹ ውስጥ የሚፈሩት ዐዋቂዎቹ ብቻ ናቸው። አላህ አሸናፊ መሓሪ ነው።” (ፋጢር 35፤28)

ይህ ጌታውን ተገዥ የሆነ አዋቂ ባህሪይ ነው። ይህ አዋቂ የጌታውን ደረጃ በዕውቀቱ አማካኝነት አውቆ እሱን ይፈራዋል፣ ይጠነቀቀዋልም።

2.አላህን መፍራት የሰው ልጅ ባህሪይ ብቻ ሳይሆን የመላኢኮችም ነው።

يَخَافُونَ رَبَّهُمْ مِنْ فَوْقِهِمْ وَيَفْعَلُونَ مَا يُؤْمَرُونَ

“ጌታቸውን ከበላያቸው ሲኾን ይፈሩታል። የታዘዙትንም ሁሉ ይሠራሉ።” (አን-ነሕል 16፤50)

3.አላህን መፍራት፣ ስራቸውን ለአላህ ብቻ ያደረጉ የዳዕዋ ሰዎች መገለጫ ነው።

الَّذِينَ يُبَلِّغُونَ رِسَالَاتِ اللَّهِ وَيَخْشَوْنَهُ وَلَا يَخْشَوْنَ أَحَدًا إِلَّا اللَّهَ وَكَفَىٰ بِاللَّهِ حَسِيبًا

“ለእነዚያ የአላህን መልእክቶች ለሚያደርሱና ለሚፈሩት ከአላህ በስተቀርም አንድንም ለማይፈሩት (ተደነገገ)። ተቆጣጣሪም በአላህ በቃ።” (አል-አሕዛብ 33፤39)

4.አላህን መፍራት፣ የሙዕሚኖች ምልክትና መታወቂያ ነው

إِنَّمَا ذَٰلِكُمُ الشَّيْطَانُ يُخَوِّفُ أَوْلِيَاءَهُ فَلَا تَخَافُوهُمْ وَخَافُونِ إِنْ كُنْتُمْ مُؤْمِنِينَ

“እንዲህ የሚላችሁ ሰይጣን ብቻ ነው። ወዳጆቹን ያስፈራራችኋል። አትፍሩዋቸውም። ምእምናንም እንደኾናችሁ ፍሩኝ።” (ኣሊ-ዒምራን 3፤175)

የአላህ ፈሪዎች ሁሉ አለቃ ረሡል (ሰ.ዐ.ወ) እንዲህ ይላሉ፡-

أنا أعلمكم بالله وأشدكم له خشية

“እኔ አላህን እጅግ በጣም አዋቂና ፈሪ ነኝ”

አላህን የመፍራት መገለጫዎች

1.አላህን መፍራት ሃቢል ወንድሙን ቃቢልን እንዳይገድለው ምክንያት ሆኖታል

لَئِنْ بَسَطْتَ إِلَيَّ يَدَكَ لِتَقْتُلَنِي مَا أَنَا بِبَاسِطٍ يَدِيَ إِلَيْكَ لِأَقْتُلَكَ إِنِّي أَخَافُ اللَّهَ رَبَّ الْعَالَمِينَ

“ልትገድለኝ እጅህን ወደኔ ብትዘረጋ እኔ ልገድልህ እጄን ወዳንተ የምዘረጋ አይደለሁም። እኔ የዓለማትን ጌታ አላህን እፈራለሁና” አለ። (አል-ማኢዳ 5፤28)

2.አላህ የተለያዩ ምልክቶችን ያደረገው ባሮቹን ለማስፈራራት (ለማስጠንቀቅ) ነው።

وَمَا مَنَعَنَا أَنْ نُرْسِلَ بِالْآيَاتِ إِلَّا أَنْ كَذَّبَ بِهَا الْأَوَّلُونَ وَآتَيْنَا ثَمُودَ النَّاقَةَ مُبْصِرَةً فَظَلَمُوا بِهَا وَمَا نُرْسِلُ بِالْآيَاتِ إِلَّا تَخْوِيفًا

“ታምራቶችንም ከመላክ የቀድሞዎቹ ሰዎች በእርሷ ማስተባበልና (መጥፋት) እንጂ ሌላ አልከለከለንም። ለሰሙድም ግመልን ግልጽ ተዓምር ኾና ሰጠናቸው። በእርሷም በደሉ። ተዓምራቶችንም ለማስፈራራት እንጂ አንንልክም።” (አል-ኢስራእ 17፤59)

አላህ ማስፈራራትን ጠማማዎች ወደ ቅኑ መንገድ ይገቡ ዘንድ የተጠቀመበት ዘዴ ነው። ብልጭታና ጉሩምሩምታ አስፈራሪ ከሆኑት የአላህ ወታደሮች መካከል ተጠቃሽ ናቸው።

هُوَ الَّذِي يُرِيكُمُ الْبَرْقَ خَوْفًا وَطَمَعًا وَيُنْشِئُ السَّحَابَ الثِّقَالَ

“እርሱ ያ የምትፈሩና የምትከጅሉም ስትሆኑ ብልጭታን የሚያሳያችሁ ከባዶች ደመናዎችንም የሚያስገኝ ነው።” (አር-ረዕድ 13፤12)

3.የሠው ልጅ በደጋጎቹ መንገድ ወደ ጌታው በሚያደርገው ጉዞው ፍርሃትንና (ኸውፍ) መሻትን (ረጃዕ) ሰንቆ ነው። ነገር ግን ወንጀልን በግልጽና በማን አለብኝነት የሚራ ከሆነ በእርግጥ በአላህ ቅጣት ተሳላቂ ሆኗል። እንዲህ አይነቱ ሠው ቂያማንና ችግሮቿን ማስታወስን ይሻል። የጀሀነምን ቅጣትና አላህ ለወንጀለኞቹ የደገሰውን ቅጣት ማስታወስ ያስፈልገዋል።

وَهُمْ يَصْطَرِخُونَ فِيهَا رَبَّنَا أَخْرِجْنَا نَعْمَلْ صَالِحًا غَيْرَ الَّذِي كُنَّا نَعْمَلُ أَوَلَمْ نُعَمِّرْكُمْ مَا يَتَذَكَّرُ فِيهِ مَنْ تَذَكَّرَ وَجَاءَكُمُ النَّذِيرُ  فَذُوقُوا فَمَا لِلظَّالِمِينَ مِنْ نَصِيرٍ

“እነርሱም በርሷ ውስጥ እርዳታን በመፈለግ በኀይል ይጮሃሉ። ‘ጌታችን ሆይ! ከእዚያ እንሠራው ከነበርነው ሌላ በጎ ሥራን እንሠራ ዘንድ አውጣን’ (ይላሉ)። ‘በእርሱ ውስጥ ያስታወሰ ሰው የሚገሰጽበትን ዕድሜ አላቆየናችሁምን? አስጠንቃቂውም መጥቶላችኋል (አስተባብላችኋልም)። ስለዚህ ቅመሱ። ለበደለኞችም ምንም ረዳት የላቸውም’ (ይባላሉ)።” (ፋጢር 35፤37)።

በተቃራኒው በነፍሶቻቸው ላይ ድንበርን ያለፉ፣ በራሳቸው ላይ ተስፋ የቆረጡና አላህ አይምረንም ብለው የደመደሙ ሠዎች ወደ አላህ በመሻት ይቅርታ እንደሚያደርግላቸው ተስፋ አድርገው ወደሱ መመለስ አለባቸው።

قُلْ يَا عِبَادِيَ الَّذِينَ أَسْرَفُوا عَلَىٰ أَنْفُسِهِمْ لَا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ

“በላቸው ‘እናንተ በነፍሶቻችሁ ላይ ድንበር ያለፋችሁ ባሮቼ ሆይ! ከአላህ እዝነት ተስፋ አትቁረጡ። አላህ ኃጢኣቶችን በመላ ይምራልና። እነሆ እርሱ መሓሪው አዛኙ ነውና’።” (አዝ-ዙመር 39፤53)

ዘጠና ዘጠኝ ሠዎችን ለገደለው ሠው የበኒ ኢስራኤል ዐሊም “በአንተና በተውበት መካከል ማነው ግርዶሽ” እንዳለው እናስታውሳለን።

4.ማስታወስና ተግሳፅ ጌታቸውን ለሚፈሩ ሠዎች እንጂ ሌላ ለማንም አይጠቅም። አንዳንድ ሠዎች “ለመሆኑ ሠዎችን እያስታወስናቸው ብዙዎቹ ከሐቁ መንገድ የሚርቁት ለምንድነው?” የሚል ጥያቄ ያነሳሉ። ምላሹ ግን “እነሡ ከሐቅ የሚርቁና ጌታቸውን ስለማይፈሩ ነው”።

إِلَّا تَذْكِرَةً لِمَنْ يَخْشَىٰ تَنْزِيلًا مِمَّنْ خَلَقَ الْأَرْضَ وَالسَّمَاوَاتِ الْعُلَى

“ግን አላህን ለሚፈራ ሰው መገሰጫ ይኾን ዘንድ (አወረድነው)። ምድርንና የላይኛዎቹን ሰማያት ከፈጠረ አምላክ ተወረደ።” (ጧሃ 20፤ 2-3)

نَحْنُ أَعْلَمُ بِمَا يَقُولُونَ وَمَا أَنْتَ عَلَيْهِمْ بِجَبَّارٍ فَذَكِّرْ بِالْقُرْآنِ مَنْ يَخَافُ وَعِيدِ

“እኛ የሚሉትን ሁሉ ዐዋቂ ነን። አንተም በእነርሱ ላይ አስገዳጅ አይደለህም። ስለዚህ ዛቻየን የሚፈራን ሰው በቁርኣን አስታውስ።”(ቃፍ 50፤45)።

وَأَنْذِرْ بِهِ الَّذِينَ يَخَافُونَ أَنْ يُحْشَرُوا إِلَىٰ رَبِّهِمْ  لَيْسَ لَهُمْ مِنْ دُونِهِ وَلِيٌّ وَلَا شَفِيعٌ لَعَلَّهُمْ يَتَّقُونَ

“እነዚያንም ከእርሱ ሌላ ረዳትና አማላጅ የሌላቸው ሲኾኑ ወደ ጌታቸው መስሰብሰብን የሚፈሩትን ይጠነቀቁ ዘንድ በርሱ (በቁርኣን) አስፈራራ።” (አል-አንዓም 6፤51)

5.የተለያዩ ፍርሃቶች፡-

አላህን መፍራትና ሰዎችን መፍራት ሁለቱም የፍርሀት አይነት ቢሆኑም በመሀከላቸው ግን ሰፊ ልዩነት አለ። ሁለቱም የፍርሃት አይነቶች በሠው ልጅ ላይ ሊገኙ ይችላሉ። ውድ ወዳጄ ሆይ በውስጥህ የሠውን ፍርሃት ከመጣብህ ይህ ጉዳይ ተፈጥሮአዊ የሆነና ሁሉም ሠው የሚያጋጥመው ነው። አንድ ሰው ሊጋፈጠው የሚያስፈራ ፍርሃት ለምሳሌ ከባድ ህመም፣ አሳሪ እርጅና፣ ጭር ያለ ጨለማ ወይም ፈላጭ ቆራጭ ሠው ሌላም ሌላም። እንኳንስ ተራ ሰው ነቢዩላህ ሙሳ (ዐ.ሰ) እንኳ ፊርዐውን ፊት ሲቀርቡ የፍርሃት ስሜት አድሮባቸዋል።

فَأَوْجَسَ فِي نَفْسِهِ خِيفَةً مُوسَىٰ قُلْنَا لَا تَخَفْ إِنَّكَ أَنْتَ الْأَعْلَىٰ

“ሙሳም በነፍሱ ውስጥ ፍርሃትን አሳደረ። ‘አትፍራ አንተ የበላዩ አንተ ነህና’ አልነው።” (ጧሃ 20፤67-68)

ሙሳና ሃሩን በመፍራታቸው አላህ እንዲህ ብሎ አረጋጋቸው።

قَالَا رَبَّنَا إِنَّنَا نَخَافُ أَنْ يَفْرُطَ عَلَيْنَا أَوْ أَنْ يَطْغَىٰ قَالَ لَا تَخَافَا  إِنَّنِي مَعَكُمَا أَسْمَعُ وَأَرَىٰ

“ጌታችን ሆይ! እኛ በእኛ ላይ ክፋት በመሥራት መቸኮሉን ወይም ኩራትን መጨመሩን እንፈራለን” አሉ። (አላህም) አለ “አትፍሩ። እኔ በእርግጥ ከእናንተ ጋር ነኝና። እሰማለሁ፤ አያለሁም።” (ጧሃ 20፤45-46)።

ሙሳ (ዐ.ሠ) ፊርዐውንና ተከታዮቹ እሳቸውን ለማጥቃት የሚያሴሩትን ሴራ እንዳወቁ በፍርሃት መሸሽ ግድ አላቸው።

فَخَرَجَ مِنْهَا خَائِفًا يَتَرَقَّبُ  قَالَ رَبِّ نَجِّنِي مِنَ الْقَوْمِ الظَّالِمِينَ

“የፈራና የሚጠባበቅ ሆኖም ከእርሷ ወጣ። ‘ጌታዬ ሆይ! ከበደለኞቹ ሕዝቦች አድነኝ’ አለ።” (አል-ቀሰስ 28፤21)

አንድ ሠው አላህን እየፈራ በሄደ ቁጥር ፍጡራንን የመፍራቱ ስሜት እየቀነሰ ይሄዳል። ይህም የጌታውን ደረጃ አውቆ ክብሩን የጠበቀ ሠው ከአላህ ውጪ ያለውን አሳንሶ ይመለከታል። ስለሆነም ከአላህ ውጪ ያለውን አይፈራም።

6.ፍርሃት እዚህ ደህንነት እዚያ፡-

ውድ ወዳጄ ከፊት ለፊትህ የቀረበልህ ምርጫ አለ። ይህም አላህን ዘንግተህ መኖርን ትመርጣለህ ወይስ አላህን ከሚፈሩና ከሚጠነቀቁ ሆነህ፣ የከለከለውን ተከልክለህ የታዘዝከውን ታዘህ ከሚመጣው ቅጣት ነፃ መሆን ትሻለህ?

ረሡል /ሰ.ዐ.ወ/ በሐዲስ አል-ቁዱስ እንደነገሩን አላህ እንዲህ ይላል

وعزتي وجلالي لا أجمع على قلب عبدي خوفين ولا أجمع عليه أمنين،  فإن أمنني في الدنيا أخفته يوم القيامة، وإن خافني في الدنيا أمنته يوم القيامة. ابن حبان

“በልቅናዬና በታላቅነቴ (እምላለሁ) በአንድ ባሪያየ ቀልብ ውስጥ ሁለት ፍርሃቶችን በአንድ ላይ አላስቀምጥም። ሁለት ደህንነቶችንም አንድ ላይ አላስቀምጥም። በዱንያ ደህንነቴን የሻ ሠው፣ በአኺራ አስፈራዋለሁ። በዱንያ ከፈራኝ ደግሞ፣ በቂያማ ደህንነቱን እጠብቅለታለሁ። (ኢብኑ ሂባን)

LEAVE A REPLY