ኢየሱስ (ዐ.ሰ)-በኢስላም ደረጃው

0
1669

ከአላህ በተላኩ በሁሉም ነቢያት ማመን የኢስላም የእምነት ዋነኛ ክፍል ስለሆነ ሙስሊሞች ሁሉንም ነቢያት ያወድሳሉ፤ ያከብራሉ። የሚገባቸውንም ክብር ይሰጣሉ።

قُولُوا آمَنَّا بِاللَّهِ وَمَا أُنزِلَ إِلَيْنَا وَمَا أُنزِلَ إِلَىٰ إِبْرَاهِيمَ وَإِسْمَاعِيلَ وَإِسْحَاقَ وَيَعْقُوبَ وَالْأَسْبَاطِ وَمَا أُوتِيَ مُوسَىٰ وَعِيسَىٰ وَمَا أُوتِيَ النَّبِيُّونَ مِن رَّبِّهِمْ لَا نُفَرِّقُ بَيْنَ أَحَدٍ مِّنْهُمْ وَنَحْنُ لَهُ مُسْلِمُونَ

“በአላህና ወደኛ በተወረደው (በቁርኣን) ወደ ኢብራሂምም ወደ ኢስማዒልምና ወደ ኢስሐቅም ወደ ያዕቁብና ወደ ነገዶቹም በተወረደው በዚያም ሙሳና ዒሳ በተሰጡት በዚያም ነቢያት ሁሉ ከጌታቸው በተሰጡት ከነርሱ በአንድም መካከል የማንለይ ስንኾን አመንን እኛም ለርሱ (ለአላህ) ታዛዦች ነን።” (አል-በቀራህ 2፡136)

إِذْ قَالَتِ الْمَلَائِكَةُ يَا مَرْيَمُ إِنَّ اللَّهَ يُبَشِّرُكِ بِكَلِمَةٍ مِّنْهُ اسْمُهُ الْمَسِيحُ عِيسَى ابْنُ مَرْيَمَ وَجِيهًا فِي الدُّنْيَا وَالْآخِرَةِ وَمِنَ الْمُقَرَّبِينَ

“መላኣክትም ያሉትን (አስታውስ) መርየም ሆይ! አላህ ከርሱ በኾነው ቃል ስሙ አል-መሲህ ዒሳ የመርየም ልጅ በዚህ ዓለምና በመጨረሻውም የተከበረ ከባለሟሎችም በኾነ (ልጅ) ያበስርሻል።” (አል-ዒምራን 3፣45)

ሁሉም የአላህ መልዕክተኞች ሰዎች ከጣዖት አምልኮ ርቀው ሠዎች አላህን ብቻ እንዲያመልኩ ጥሪ አድርገዋል። ትክክለኛውን ኢስላማዊ የህይወት መንገድ ለህዝቦቻቸው ሰብከዋል። ቢሆንም ግን፤ ብዙዎች በህዝባቸው ተሰድበዋል፤ ተመተዋል፤ ቆስለዋል፤ ደምተዋል፤ ተሰደዋል ብሎም ለዚህ መልዕክት ህይወታቸውን ሰውተዋል።

ነብዩ ሙሐመድ (ሰ.ዐ.ወ) የኢስላም መስራች አልነበሩም። ምክንያቱም፤ ሁሉም ነቢያት ወደ ኢስላም ነው ጥሪ ያደረጉት። ከአደም (ዐ.ሰ) ጀምሮ እስከ ኢብራሂም፣ ከኢስሀቅ እስከ ዒሳ፣ ከዚያም እስከ መጨረሻው ነቢይ ሙሐመድ (ሰ.ዐ.ወ) ድረስ ሁሉም ኢስላምን ሰብከዋል።

ለብዙ ሰዎች ሙስሊሞች በዒሳ (ኢየሱስ) (ዐ.ሰ) ማመናቸው ይደንቃቸዋል። አንድ ሙስሊም በዒሳ (ዐ.ሰ) ነብይነት እስካላመነ ድረስ ፈፅሞ ሙስሊም ሊሆን አይችልም። ኢየሱስ (ዐ.ሰ) ከአላህ ክቡር ነቢያት አንዱ ነበር። ቁርዓንም ዒሳን (ዐ.ሰ) መልካም በሆኑ ስሞች አውስቶታል። አንዳንዴ ዒሳ (ዐ.ሰ) በሌላም ቦታ አል-መሲህ (ክርስቶስ) አንዳንዴም የመርየም ልጅ በማለት ጠርቶታል። ሁሉም ሙስሊም ያከብረዋል፤ ይወደዋል፤ ያልቀዋል። ተመልከቱ በብዙ ሺዎች የሚቆጠሩ የዓለማችን ሙስሊሞች ዒሳ በሚለው ስያሜ መጠራታቸው ያስደስታቸዋል። እንዲሁም በብዙ ሺዎች የሚገመቱ ሙስሊም ሴቶችም መርየም በሚለው በኢየሱስ እናት ስም መጠሪያቸውን በማድረጋቸው ይኮራሉ።

ቁርኣን እንደ ወንጌል ወይም እንደ አዲስ ኪዳን መልዕክት ስለኢየሱስ ብቻ አያወራም። ቁርዓን ጠቅላይ መልዕክት ነው። በተብራራ ሁኔታ ስለፈጣሪ አንድነትና ብቸኝነት፣ ፈጣሪን በብቸኝነት መገዛት እንደሚገባን ይተነትናል። ስለአብዛኞቹ የፈጣሪ ነቢያትና መልዕክተኞችም ያወራል። ከዚህ ሁሉ በተጨማሪ ስለ ኢየሱስ (ዐ.ሰ) ድንቅ እውነታዎችም ጠቅሷል። እናቱ መርየም ንፁህና ቅድስት የአላህ አገልጋይ ነበረች። አንድ ወቅት የአላህ መልኣክ ወደ ርሷ ዘንድ በመምጣት ልጅ ያበስራታል። መርየም ከማንም ወንድ ጋር ግንኙነት ሳይኖራት ከአላህ ዘንድ በሆነ “የይሁን ቃል” ወደዚህች ምድር ይመጣል። ልጁም በተዓምራዊ ውልደት ይወለዳል። ይህ ተዓምራዊ ውልደት ሙስሊሞችንና ክርስቲያኖችን በተለያየ ጎራ አሰልፏቸዋል።

የኢየሱስ መልዕክት እንደሌሎቹ ነቢያቶች ሁሉ የተውሂድ (አላህን በብቸኝነት ማምለክ) ጥሪ ነበር። እንዲሁም፤ ሰዎችን የመልካም ሥነ-ምግባር ባለቤት እንዲሆኑ ለሌሎች እንዲያዝኑና እንዲራሩ ጥሪ አድርጓል። ዒሳ ህዝቦቹ ከፈጣሪ ትዕዛዝ በስተጀርባ ያለውን ሰማያዊ ኃይልና ክብር ይረዱ ዘንድ በፅኑ ታግሏል።

እኛ ሙስሊሞች ለነቢያት በሚሰጥ የፈጣሪ ተዓምር እናምናለን። ሙሳ/ሙሴ (ዐ.ሰ) በዘንጉ (ወደ እባብ የምትቀየር) የተጻራሪዎቹን ጠንቋዮች ሁሉ እባብ አልዋጠም? በብትሩ የቀይ ባህር ለሁለት አልከፈለም? ይህ ተዐምር ነው ብለን ከተቀበልን ለምን የዒሳ (ኢየሱስ) (ዐ.ሰ) ውልደትን ልዩ እናደርገዋለን? አላህ የዒሳን (ኢየሱስ) (ዐ.ሰ) አወላለድ እሱ በሻው መልክ ይሆን ዘንድ ፈለገ፤ ፈፀመውም! ወደራሱ ወደ ኢየሱስ ስንመለስ፣ የርሱ ዘመን ሰዎች መለኮታዊውን ኃይል የዘነጉበት ወቅት ነበር። ስለሆነም፤ ሰዎችን ወደ መለኮታዊው ኃይል ለመጥራት ከሞት ሰዎችን አላስነሳምን? የታወሩትን አይናቸውን አላበራምን? የስጋ ደዌ የያዛቸውን አልፈውስምን? ይህ ተዓምር ከአላህ ዘንድ የተሰጠ ድንቅ ስጦታ ከሆነ፣ የርሱን ተዐምራዊ ውልደት እንደሌላው ተዓምር በተዓምርነት መቀበሉ ምኑ ላይ ይከብዳል? ኢየሱስ የተለያዩ ተዓምራትን ከማሳየቱ በላይ በወቅቱ ለህዝቦቹ ስለሰማያዊው ኃይል እያስተማረ ነበር። ቁርኣንም እነዚህን ሁሉ ተዓምራት በፈጣሪ ፍቃድ ብቻ የተፈጸሙ እንጂ ሌላ እንዳልሆኑ በጽኑ ያስረዳል።

የኢየሱስ መልዕክት እንደሌሎቹ ነቢያቶች ሁሉ የተውሂድ (አላህን በብቸኝነት ማምለክ) ጥሪ ነበር። እንዲሁም፤ ሰዎችን የመልካም ሥነ-ምግባር ባለቤት እንዲሆኑ ለሌሎች እንዲያዝኑና እንዲራሩ ጥሪ አድርጓል። ዒሳ ህዝቦቹ ከፈጣሪ ትዕዛዝ በስተጀርባ ያለውን ሰማያዊ ኃይልና ክብር ይረዱ ዘንድ በፅኑ ታግሏል።

ግና ዒሳ በህዝቦቹ አልተከበረም ተናቀ፣ ተገፋ፣ ተዋረደ። ይባስ ብለውም ሊሰቅሉት እና ሊገሉት ተስማሙ። እዚህ ላይ ሁለተኛው የሙስሊሞችና የክርስቲያኖች በዒሳ ላይ ያላቸው ልዩነት ይመጣል። ክርስቲያኖች ዒሳን ተሰቅሏል ብለው ሲያምኑ ሙስሊሞች ግን ይህን ሀሳብ አንቀበልም። መልሱንም ክርስቲያኖች ከራሳቸው መፅሀፍ ይፈልጉ ዘንድ እንጠይቃለን። ተመልከቱ፣ ኢየሱስ የሞትን ፅዋ ያነሳለት ዘንድ ጌታውን እንደተማፀነ ከጠላቶቹ ይታደገው ዘንድም ፈጣሪውን እንደለመነ በመፅሀፍ ቅዱስ ማርቆስ ወንጌል ምዕራፍ 14 ቁጥር 36 እና በሉቃስ ወንጌል ምዕራፍ 22 በቁጥር 42 በሚገባ ተቀምጧል። ታዲያ የነቢያቱን ልመና የማይመልሰው ፈጣሪም ልመናውን ተቀበለው። ከሴረኞቹ ሴራ፣ ከጠላቶቹ ደባ ታደገው። በተዐምር ይወለድ ዘንድ ያስቻለው ፈጣሪ እርሱን ከመሰቀል ማዳን ያቅተዋልን? በፍፁም! ወደ ሰማይም አነሳው (ቁርዓን አል-ኒሳእ 4÷157-158ን ይመልከቱ)።

ከዚህ ክስተት በኋላም የኢየሱስ የመልዕክተኛነት ሚና አይጠናቀቅም። ሙስሊሞች ዒሳ (ዐ.ሰ) ወደፊት ተመልሶ ወደ ምድር እንደሚመጣና ፍትህና ነፃነትን ለማስፈን እንደሚታገል እናምናለን። ከእርሱ ጠላት ከሆነው ደጃልም ጋር እንደሚዋጋና ሁሉን ሰይጣናዊ አመለካከት አስወግዶ ሰላምን እንደሚያወርድ ቀናተኛውን መንገድ እንደሚያስይዝ እናምናለን። ያኔ እውነተኛ የኢየሱስ ተከታዮች ድልን ያገኛሉ። ያልተገባውን ደረጃ የሰጡት ኃይሎች ሁሉ ይዋረዳሉ። ይከስማሉ። ሰው ነውና ከዚያም የቆየውን ቆይቶ እንደማንኛውም ሰውይሞታል። ይቀበራልም።

በኢየሱስ (ዐ.ሰ) ላይ ሦስቱ ሰማያዊ ኃይማኖቶች ያላቸውን አመለካከት በሚቀጥለው ሠንጠረዥ ይመልከቱ።

 

ዒሳ (ኢየሱስ)(ዐ.ሰ)

ክርስቲያኖች

ሙስሊሞች

አይሁዶች

1

ከድንግል መወለዱን /ተዐምራዊ ውልደት/

አዎ

አዎ

አይቀበሉም

2

የአላህ ልጅ

አዎ

አይቀበሉም

አይቀበሉም

3

የአላህ የይሁን ቃል

አዎ

አዎ

አይቀበሉም

4

የአላህ ነቢይ

አዎ

አዎ

አይቀበሉም

5

ወንጌልን ማምጣቱ (ኢንጅል)

አዎ

አዎ

አይቀበሉም

6

ተዐምራቶቹን

አዎ

አዎ

አይቀበሉም

7

መሰቀሉን

አዎ

አይቀበሉም

አዎ

8

ወደ ሰማይ ማረጉን

አዎ

አዎ

አይቀበሉም

9

አል-መሲህ (ክርስቶስ) መሆኑን

አዎ

አዎ

አይቀበሉም

10

ተመልሶ ወደ ምድር ይመጣል

አዎ

አዎ

አይቀበሉም

ስለዚህ የሙስሊሞችና ክርስቲያኖች ዋና ልዩነት የሚመጣው ኢየሱስን በአምላክነት መቀበልና መሰቀሉን በተመለከተ ነው። ነገርግን፤ በአላህ አምላክነትና በኢየሱስ ነብይነት ላይ ተመሳሳይ አመለካከት አላቸው። ይህ ተቀራራቢ አቋም ሁለቱ ኃይማኖቶች የበለጠ ተቀራርበው እንዲነጋገሩና ጥሩ ግንኙነት እንዲያዳብሩ ይረዳቸዋል።

LEAVE A REPLY