በረመዳን ምን ይጠበቅብናል? (ክፍል 3)

0
3374

ከሠዎች ጋር…

ለበጎ ተግባር መሮጥ ለሠዎች መልካም ውለታ ለመዋል መጣር ለቀልብ የሚያተርፈው ትልቅ የኢማን ፀጋ አለ። ኢማን ይጨምራል። ሠውየውንም አላህ ዘንድ ተወዳጅ እንዲሆን ያደርገዋል። የአላህ መልእክተኛ (ሰ.ዐ.ወ) እንዲህ ብለዋል፡-

أحب الناس إلي الله أنفعهم، وأحب الأعمال إلي الله عز وجل سرور تدخله علي مسلم، أو تكشف عنه كربة، أو تقضى عنه دينا، أو تطرد عنه جوعا، ولأن أمشي مع أخي المسلم في حاجة، أحب إلي من أن أعتكف في المسجد شهراً، ومن كف غضبه ستر الله عورته، ومن كتم غيظاً – لو شاء أن يمضيه أمضاه – ملأ الله قلبه رضا يوم القيامة، ومن مشى مع أخيه المسلم في حاجته حتى يثبتها له، أثبت الله قدمه يوم تزل الأقدام، وإن سوء الخلق ليفسد العمل كما يفسد الخل العسل

“ከሠዎች መሀል አላህ ዘንድ ተወዳጁ ለሠዎች ጠቃሚ የሆነው ነው። አላህ ዘንድ ተወዳጅ ሥራ ሙስሊም ልብ ውስጥ የምታስገባው ደስታ፣ የምትገላግለው ጭንቅ፣ ከዱንያ የምትፈፅምለት ጉዳይ ወይም የምትገፈትርለት ረሀብ ነው። በአላህ እምላለሁ መስጂድ ውስጥ ወር በሙሉ ኢዕቲካፍ አድርጌ ከምቀመጥ ለሙስሊም ወንድሜ ጉዳይ ብሮጥ እመርጣለሁ። መበቀል እየቻለ ቁጣውን የሚደብቅ አላህ ነውሩን ይሸፍንለታል። ቁጭቱን የዋጠ ሰው የቂያም ቀን አላህ ልቡን በውዴታው ይሞላለታል። የሙስሊም ወንድሙ ጉዳይ እስኪፈፀም ድረስ የተንቀሳቀሰ የሰዎች እግር ሲራጥ ላይ በሚስትበት ቀን አላህ እግሩን ያረጋለታል። ጥፉ ስብእና ልክ ኮምጣጤ ማርን እንደሚያበላሽ መልካም ሥራን ያበላሻል።”

ውድ አንባቢዎች! በረመዳን ውስጥ ቢሠሩ የምንመርጣቸው ውስን መልካም ተግባራትን በሚከተለው የፅሁፋችን ክፍል ላይ እናቀርባለን። ዋናው ነጥብ ግን እንዳይዘነጋ። በረመዳን የምንሠራቸውን ተግባራት ከረመዳን ውጭም ማስለመድ አለብን። ረመዳን ግን የመለማመጃ ጊዜ ነውና መልካም ነገሮችን በሙሉ መለማመድ አለብን። “መልካም ተግባርን ተለማመዱ፤ መልካም ነገር ልምድ ነውና!” ይባል የለ!!

1.ለሚስትና ለልጆች መልካም መዋል

ለሚስትና ለልጆች መልካም ውለታ መዋል የሚጀምረው እጃቸውን ይዞ ወደ አላህ መንገድ በመምራት፣ ወደ ጀነት የሚደረግ እሽቅድድም ላይ ፈጣን ተወዳዳሪዎች እዲሆኑ በማገዝ ነው። አላህ ይህን እንድናደርግ አዞናል። አንዲህ ብሏል፡-

يَا أَيُّهَا الَّذِينَ آمَنُوا قُوا أَنفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَّا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ
“እናንተ ያመናችሁ ሆይ! ነፍሶቻችሁንና ቤተሰቦቻችሁን መቀጣጠያዋ ሰዎችና ደንጋዮች ከኾነች እሳት ጠብቁ። በእርሷ ላይ ጨካኞች፣ ኀይለኞች የኾኑ መላእክት አልሉ። አላህን ያዘዛቸውን ነገር (በመጣስ) አያምጹም። የሚታዘዙትንም ሁሉ ይሠራሉ።” (አት-ተሕሪም 66፤ 6)

ከረመዳን ሥጦታ መጠቀም አለብን። የቤተሰቦቻችንን ኢማን ማሳደግ አለብን። ስብእናቸውንም ወደ ላይ ከፍ ማድረግ አለብን። ረመዳን ከመግባቱ በፊት ከነርሱ ጋር እንቀመጥ። እያንዳንዱ የቤተሰብ አባል የሚመጥነውን የፕሮግራም ዝርዝር ያውጣ። ፕግራሙም የጠቀስናቸውን ሁለቱን ምሶሶዎች (ከአላህ ጋርና ከሠዎች ጋር) ማሟላት አለበት።

እንደዚሁም ወቅታቸውን በሙሉ ልናስተናብርላቸው ይገባል። ግዴታ የሚሆንባቸውን ተግባር የሚፈፅሙበት መንገድም ልናመቻችላቸው ያስፈልጋል። ቤት ውስጥ እንደ መስጂድ አድርገው የሚይዙት ቦታ ማመቻቸት አለብን። በየቀኑ አብረናቸው የምንሆንበት ለሁሉም የሚመች አጭር የመሰብሰቢያ ጊዜ እናድርግ። ከዚያም የቻልነውን ያህል አብረን ቁርአን እንቅራ። ከንባባችንም ባሻገር ውስጣችን የተፈጠረውን የማስተንተን ስሜት እንለዋወጥ። ከዚያም አንድ ጠቃሚ የሆነ መፅሀፍ እናነባለን። ምናልባት ሪያዱሷሊሂን ወይም አንድ የሲራ መፅሀፍ ቢሆን እንላለን። በስተመጨረሻ የቀን ውሎአችንን ተገማግመን መልካም የሠራን በማመስገን ያጓደለውን ደግሞ ስሜቱን በመጠገን እና ለራሳችን እና ለሙስሊሞች በሙሉ ዱዓ በማድረግ ስብሰባችንን እናጠናቅቃለን። ይህን ስብሰባ ከፈጡር በፊት ብናደርገው ደስ ይላል።

2.ችሮታና ልግስና

ይህ የበጎ አድራጎት በር ትልቅ ነው። በተለይም በረመዳን ሁላችን እንድንገባበት ያሻል። “የአላህ መልእክተኛ ቸር ነበሩ። በተለይም በረመዳን ጂብሪል ስለሚያገኛቸው ይበልጥ ቸር ይሆናሉ። በረመዳን በየለሊቱ ጂብሪል ያገኛቸዋል። ቁርአን ያጣናቸዋል። የአላህ መልእክተኛ (ሰ.ዐ.ወ.) ከተለቀቀ ጎርፍ የበለጠ ቸር ነበሩ።”

በዚህ ወር ውስጥ መልካም ተግባርን በመፈፀም እራሳችንን ለአላህ እይታ እናቅርብ። እርሱ የቸርነትና የሥጦታ ባለቤት ነው።

إن الله كريم يحب الكرماء جواد يحب الجودة، يحب معالي الأمور ويكره سفسافها

 

“አላህ ለጋስ ነው። ለጋሶችን ይወዳል። ቸር ነው። ቸሮችን ይወዳል። ታላላቅ ነገሮችን ይወዳል። ጅላጅል ነገሮችን ይጠላል።” ይላሉ የአላህ ነብይ (ሰ.ዐ.ወ)። ከቸርና ከለጋስ ሰዎች ባህሪያት መሀል ያለሀሳብ ያላቸውን ሁሉ መስጠታቸው ነው። ይህ ስጦታቸው ገንዘብ፣ እውቀት፣ ጊዜ ወይም ጉልበት ሊሆን ይችላል። ቁምነገሩ ያላቸውን ሁሉ ይሠጣሉ፤ አይሰስቱም።

የአላህ መልእክተኛ (ሰ.ዐ.ወ) አስማእ ቢንት አቢበክርን እንዲህ ብለው መክረዋታል።

لا تحصي فيحصي عليك

“አትቁጠሪ ይቆጠርብሻል!”

የዚህ ንግግር ትርጉም- ኢማም ኢብኑ ሐጀር ፈትህ የተሰኘው መፅሐፋቸው ላይ እንዳሉት- “ያልቃል ብለሽ ሶደቃ አትከልክይ ማለታቸው ነው። ይህ በረካን የሚያጠፋ ትልቅ ሰበብ ነው። ምክንያቱም አላህ ያለሂሳብ ይመነዳል። ምንዳው ለማይተመን ጌታ የምንሰጠውን ስጦታ ደግሞ እንዴት እንተምነዋለን! ካላሰበበት አላህ እንደሚመግበው የሚረዳ ሰው ሳያስብና ሳይቆጥር ሊሰጥ ይገባል።”

ረመዳንን ችሮታና ልግስናን የምንለምድበት አጋጣሚ እናድርገው። ከገንዘባችን፣ ከጊዜያችን እና ከጉልበታችን አላህ ላይ አንሰስት። ያለሂሳብ ለአላህ እንለግስ።

በኢማም በይሀቂይ “ሹዐቡል ኢማን” በተሰኘው መፅሀፍ ላይ እንዲህ የሚል ተዘግቧል። “የዚድ ኢብኑ መርዋን ብዙ ገንዘብ መጣለት። ከዚያም እየዘገነ ለወንድሞቹ ይልክ ገባ። እንዲህም ይል ነበር “እኔ ለወንድሞቼ ጀነት እንዲሰጣቸው እየተማፀንኩት ከገንዘቤ ብሰስትባቸው አላህን አፍረዋለሁ!!”

3.ዝምድና መቀጠል

በረመዳን ውስጥ ያለውን የዝምድና ሐቅ ከመናገራችን በፊት ተከታዩን ሐዲስ አብረን እንድናስተነትን እጋብዛለሁ። ከሐዲሱ በነፍሳችን ላይ ያጓደልነውን ትርፍ እንገነዘባለን። በዱንያና በአኼራ ለሚሠጡ መልካም ስጦታዎች ያለንን ቸላተኝነትም እንመለከታለን።

የአላህ መልእክተኛ (ሰ.ዐ.ወ) እንዲህ ብለዋል፡-

ما من ذنب أجدر أن يعجل الله تعالى لصاحبه بالعقوبة في الدنيا مع ما يدخره له في الآخرة من قطيعة الرحم، والخيانة والكذب، وإن أعجل الطاعة ثواب لصلة الرحم، حتى إن أهل البيت ليكونوا فجرة فتنموا أموالهم، ويكثر عددهم إذا تواصلوا

“ዝምድናን እንደመቁረጥ፣ እንደ ክዳትና ውሸት አኼራ ላይ ከሚከማች ቅጣት በተጨማሪ ዱንያ ውስጥ ቅጣት የሚያቻኩል ምንም አይነት ኃጢያት የለም። ዝምድናን እንደመቀጠል በፍጥነት ምንዳው የሚሠጥበት በጎ ሥራ የለም። የመፍጠኑም ማሳያ ጠማሞች ቢሆኑም እንኳን የዝምድና ቀጣዩ ቤተሰቦች ገንዘብ ሲበረክት ልናይ እንችላለን። ዝምድናቸውን በቀጠሉ ቁጥር ቁጥራቸው ሲበዛም እናያለን።”

የረመዳንን መግባት ዘመዶቻችንን ለመዘየር መልካም አጋጣሚ እናድርገው። ምናልባት የማያዘያይር ችግር ከገጠመን ስልክ እና መሠል የመገናኛ መንገዶችን በመጠቀም ከዚህ በጎ ሥራ ተጠቃሚ እንሁን።

بلوا أرحامكم ولو بالسلام

“…በሰላምታም ቢሆን ዝምድናችሁን ቀጥሉ።” ብለዋል የአላህ መልእክተኛ (ሰ.ዐ.ወ)።

ማንም ሰው ያለፈን ጥል እና ቅያሜ ላለመጠያየቂያ ሰበብ ሊያደርገው አይችልም። አንድ ሠው ወደ ነብዩ (ሰ.ዐ.ወ.) መጣና “እኔ ዘመዶች አሉኝ። እቀጥላቸዋለሁ ይቆርጡኛል። መልካም እውልላቸዋለሁ፤ እነርሱ ያስከፉኛል። እኔ ስችላቸው እነርሱ ድንበር ያልፉብኛል።” አለ። መልእክተኛውም (ሰ.ዐ.ወ.) እንዲህ አሉ፡-

لئن كان كما تقول فكأنما تسفهم الملل ولا يزال معك من الله ظهير عليهم ما دمت علي ذلك

“እንደምትለው ከሆንክ ልክ ረመጥ እንደምታቅማቸው ነው። በዚህ ሁኔታ እስካለህ ድረስ ላንተ ከአላህ በኩል ጠባቂ ከመኖር አይወገድም።”

4.ምግብ ማብላት

ይህ ትልቅ የበጎ ተግባር ደጃፍ ነው። ነገር ግን ብዙዎች ችላ ብለውታል።

إن من الجنة غرفا يري ظاهرها من باطنها، وباطنها من ظاهرها قالوا: لمن هي يا رسول الله؟ قال: لمن أطعم الطعام وأطاب الكلام، وصلى بالليل والناس نيام

“ጀነት ውስጥ ሰገነቶች አሉ። የውጭው ክፍል ከውስጥ ይታያል። የውስጡን ደግሞ ከውጭ በኩል ማየት ይቻላል።” አሉ፤ የአላህ መልእክተኛ (ሰ.ዐ.ወ.)። የአላህ መልእክተኛ ሆይ! ለማን የተዘጋጁ ናቸው? ብለው ጠየቁ፤ ሶሐቦቹ። “ምግብ ላበላ፤ ንግግርን ላሳመረ፤ ሰዎች ተኝተው ሳሉ በለሊት ለሰገደ።”

ሱሀይብ (ረ.ዐ.) ብዙ ምግብ ያበላ ነበር። ከዚያም ዑመር (ረ.ዐ.) “ሱሀይብ ሆይ! አንተ ብዙ ምግብ ታበላለህ። ይህ ደግሞ ገንዘብን ማባከን ነው።” አሉት። እርሱም “የአላህ መልእክተኛ (ሰ.ዐ.ወ.) ከእናንተ መሀል ምርጣችሁ ምግብ ያበላና ሰላምታን የመለሰ ነው። ብለውኛል። እኔንም ብዙ እንዳበላ ያደረገኝ ይህ ነው።” አለ።

ዐሊይ ኢብኑ አቢጣሊብ (ረ.ዐ.) እንዲህ ይሉ ነበር። “ወደ ሱቅ ወጥቼ አንዲት ባርያ ገዝቼ ነፃ ከማደርግ ጓደኞቼን ሰብስቤ አንዲት ቁና ምግብ ባበላ እመርጣለሁ።”

በመሀላችን ያለውን ትስስርና ፍቅር ለማጠንከር ጓደኞቻችንን፣ ወዳጆቻችንን፣ ወንድሞቻችንን እና ጎረቤቶቻችንን ሰብስበን ብንጋብዝ መልካም አየር እንፈጥራለን። ከዚሁ ጋር ምስኪኖችን ማብላት ደግሞ ልዩ ጥቅም አለው። ልቡ በመድረቁ እየተጎዳ መሆኑን የመሰሞተን አንድ ሰው የአላህ መልእክተኛ (ሰ.ዐ.ወ.) እንዲህ ሲሉ መክረውታል።

إن أحببت أن يلين قلبك فأطعم المسكين وأمسح رأس اليتيم

 

“ልብህ እንዲለሰልስ ከፈለክ ሚስኪኖችን መግብ። የየቲምን ራስ አብስ።”

ለድሆችና ለሚስኪኖች የማፍጠሪያ ግብዣዎችን እናዘጋጅ። ከነርሱም ጋር አብረን በመቀመጥ ምግባቸውን ብንቋደስ እና የወንድምነትና የእህትነት ስሜታቸውን ለማሳደግ ብንሞክር ልብ ላይ የሚፈጥረው የኢማን ስሜት ልዩ ነው። ከዚህም ጋር ችግር ያለባቸውን፣ በበደል ስር የሚኖሩ፣ ነእስር የሚማቅቁት፣ በመሳደድ ላይ የሚገኙና በረሀብ አረንቋ እየተንገላቱ የሚገኙ ህዝቦችን እናስብ።

من فطر صائما كان له مثل أجره غير أنه لا ينقص من أجر الصائم شيئا

“ፆመኛን ያስፈጠረ ሰው የፆመኛው ምንዳ ሳይቀንስ ለርሱም የፆመኛው አምሳያ ምንዳ።” የሚለውን የነብዩ (ሰ.ዐ.ወ.) ብስራት እንዳንረሳ።

5.ሠዎችን ማስታረቅ

ብዙ ጊዜ ሠዎች የሚቀያየሙባቸውን ነገሮች ብንመለከት ተራ ጉዳዮች እንደሆኑ እንታዘባለን። ነገር ግን ሰይጣን በመሀል ገብቶ ያቀጣጥለዋል። ከዚያም አባትና ልጅን ያቆራርጣል። ጎረቤትን ከጎረቤት ጋር ያቃቅራል። ወዳጅን ከወዳጁ ያጣላል። በዚህ በተመረዘ አየር ላይ ጥርጣሬዎች ይበዛሉ። ዝምድናዎችም ይቆረጣሉ። ጠላትነትም ይዋረሳል። ስለዚህ ሠዎችን ለማስታረቅ መጣር ታላቅ ምንዳ አለው።

ብዙ ጊዜ ሠዎች የሚቀያየሙባቸውን ነገሮች ብንመለከት ተራ ጉዳዮች እንደሆኑ እንታዘባለን። ነገር ግን ሰይጣን በመሀል ገብቶ ያቀጣጥለዋል። ከዚያም አባትና ልጅን ያቆራርጣል። ጎረቤትን ከጎረቤት ጋር ያቃቅራል። ወዳጅን ከወዳጁ ያጣላል። በዚህ በተመረዘ አየር ላይ ጥርጣሬዎች ይበዛሉ። ዝምድናዎችም ይቆረጣሉ። ጠላትነትም ይዋረሳል። ስለዚህ ሠዎችን ለማስታረቅ መጣር ታላቅ ምንዳ አለው።

لَّا خَيْرَ فِي كَثِيرٍ مِّن نَّجْوَاهُمْ إِلَّا مَنْ أَمَرَ بِصَدَقَةٍ أَوْ مَعْرُوفٍ أَوْ إِصْلَاحٍ بَيْنَ النَّاسِ ۚ وَمَن يَفْعَلْ ذَٰلِكَ ابْتِغَاءَ مَرْضَاتِ اللَّهِ فَسَوْفَ نُؤْتِيهِ أَجْرًا عَظِيمًا

“ከውይይታቸው በምጽዋት ወይም በበጎ ሥራ ወይም በሰዎች መካከል በማስታረቅ ከሚያዙ ሰዎች ውይይት በስተቀር በብዙው ውስጥ ደግ ነገር የለበትም። ይኸንንም (የተባለውን) የአላህን ውዴታ ለመፈለግ የሚሠራ ሰው ታላቅ ምንዳን እንሰጠዋለን።” (አን-ኒሳእ 4፤ 114)

የአላህ መልእክተኛ (ሰ.ዐ.ወ) በዚህ መልካም ሥራ ውስጥ የሚሳተፍን ሠው ከፆመኞች፣ ከሠጋጆችና ከመፅዋቾች የላቀ ደረጃ እንዳለው ቃል ገብተዋል። ምክንያቱም ይህ ተግባር በማህበረሰብ መሀል እርቅን ማስፋፋት፣ እዝነትና ፍቅርን ማጎልበት ነው። መልእክተኛው (ሰ.ዐ.ወ)

ألا أخبركم بأفضل من درجة الصيام والصلاة والصدقة؟ قالوا: بلي، قال: صلاح ذات البين فإن فساد ذات البين هي الحالقة

“ከፆም ከሶላት እና ከሶደቃ ደረጃ በላይ የሆነን ነገር አልነግራችሁም!?” አሉ። “አዎን! ንገሩን” አሉ፤ ባልደረቦቻቸው። “ሰዎችን ማስታረቅ ነው። በሰዎች መሀል ያለ ግንኙነት መበላሸት (ዲንን) ይላጫል።”

የረመዳንን መግባት ሰዎችን ለማስታረቅ እንጠቀምበት። የተጣሉ ሠዎችን ይህን የአላህ አንቀፅ እናስታውሳቸው።

وَالصُّلْحُ خَيْرٌ

“መታረቅም መልካም ነው።” (አን-ኒሳእ 4፤ 128)

ከነፍሳችን እንጀምር። የበደለንን ይቅር እንበል። ላስከፋን በጎ እንዋል። ለሌሎች ወገኖች የመቻል፣ የትእግስት፣ የእዝነት እና የሰፊ ልብ ምሳሌ እንሁን።

6.የሰዎችን ጉዳይ መፈፀም

ከታላላቅ በጎ ተግባሮች ውስጥ ለሰዎች ጉዳይ መሮጥና ስለሰዎች መጨነቅ አንዱ ነው። ምክንያቱም በጎ አድራጊ ለአላህ ብሎ ለፍጡሮች አዝኗል። ስለዚህ ምንዳውም የተግባሩ አምሳያ ነው። የአላህ መልእክተኛ (ሰ.ዐ.ወ.) እንዲህ ብለዋል፡-

“ከሠዎች መሀል አላህ ዘንድ ተወዳጁ ለሠዎች ጠቃሚ የሆነው ነው። አላህ ዘንድ ተወዳጅ ሥራ ሙስሊም ልብ ውስጥ የምታስገባው ደስታ፣ የምትገላግለው ጭንቅ፣ ከዱንያ የምትፈፅምለት ጉዳይ ወይም የምትገፈትርለት ረሀብ ነው። በአላህ እምላለሁ መስጂድ ውስጥ ወር በሙሉ ኢዕቲካፍ አድርጌ ከምቀመጥ ለሙስሊም ወንድሜ ጉዳይ ብሮጥ እመርጣለሁ። ቁጣውን የሚደብቅ አላህ ነውሩን ይሸፍንለታል። ቁጭቱን የዋጠ ሰው የቂያም ቀን አላህ ልቡን በውዴታው ይሞላለታል። የሙስሊም ወንድሙ ጉዳይ እስኪፈፀም ድረስ የተንቀሳቀሰ የሰዎች እግር በሚስትበት ቀን አላህ እግሩን (በሲራጥ ላይ) ያረጋለታል። ጥፉ ስብእና ልክ ኮምጣጤ ማርን እንደሚያበላሽ መልካም ሥራን ያበላሻል።”

በሌላ በኩል ባለቤታቸው የሞተባቸው ሴቶችንና ሚስኪኖችን መንከባከብ የተለየ ምንዳ እንደሚያስገኝ ነብያዊ ሐዲሶች አበክረው ይጠቁማሉ። የአላህ መልእክተኛ (ሰ.ዐ.ወ) እንዲህ ይላሉ፡-

الساعي على الأرملة والمسكين كالمجاهد في سبيل الله أو القائم الليل الصائم النهار

“ባላቸው ለሞተባቸው ሴቶች እና ለሚስኪን ጉዳይ የሚሮጥ በአላህ መንገድ ላይ እንደሚታገል (ሙጃሂድ) ወይም ለሊት እንደሚቆምና ቀን እንደሚፆም ሠው ነው።”

እነዚህ ሐዲሶች ብዙ ትንታኔ የሚያሻቸው አይደሉም። ተግባር ዋናው ነገር ነውና የሐኪም ኢብኑ ሒዛምን ተግባራዊ ምሳሌ እናንሳ። ሐኪም ሊረዳው የሚችለው ባለጉዳይ ወይም ችግርተኛ ያጣ ቀን በጣም ይተክዛል። እንዲህ ይላል፡-

“ባለጉዳይ ያጣሁበት እያንዳንዱ ቀንን ትልቅ አደጋ እንደደረሰብኝ ቆጥሬው (ለትእግስቴ) ከአላህ ምንዳ እከጅልበታለሁ።”

7.የነፍስ አድን ጥሪ!

ኢብሊስ ብዙ ሰዎችን ማጥመም ችሏል። ከጌታቸው አምልኮ ጋረዳቸውና በዱንያ ጌጦች እንዲታለሉ አደረገ። ወደ እሳት የሚወስዳቸውን መንገድም መራቸው። እና እኛስ እነዚህን ሰዎች እንተዋቸው፤ ይጥፉ!?

አላህ እንዲህ ብሏል፡-

وَمَنْ أَحْسَنُ قَوْلًا مِّمَّن دَعَا إِلَى اللَّهِ وَعَمِلَ صَالِحًا وَقَالَ إِنَّنِي مِنَ الْمُسْلِمِينَ

“ወደ አላህ ከጠራና መልካምንም ከሠራ፣ ‘እኔ ከሙስሊሞች ነኝ’ ካለም ሰው ይበልጥ ቃሉ ያማረ ማን ነው?” (ፉሲለት 41፤ 33)

እነዚህን ሚስኪኖች ማዳን አለብን። ዳዕዋ ልናደርግላቸው ይገባል። አላህ ዳዕዋ እንድናደርግ አዟል። ይህን ትእዛዝ የሚተገብሩ ሰዎችን ደረጃ ከነብያትና ከመልእክተኞች ደረጃ ጋር የሚስተካከል አድርጓል። ምንዳው ደግሞ ድንበር የለውም። ታዲያ ውድ ወንድምና እህቶች ይህን ደረጃ ለማግኘት አንጓጓም!?…

ዛሬ ረመዳን ላይ ሰይጣኖች ታስረዋል። ነፍሶችም ታዛዦች ናቸው። ታዲያ ይህን አጋጣሚ ለዚህ ኃላፊነት መጠቀም ብልህነት አይደለምን!?… የአላህ መልእክተኛ (ሰ.ዐ.ወ) እንዲህ ብለዋል፡-

لئن يهدي الله بك رجلاً واحداً خير لك مما طلعت عليه الشمس

“ፀሀይ የወጣችበት ሁሉ ከሚኖርህ አላህ አንድን ሰው ወደ ቀና መንገድ ቢመራልህ ይሻልሀል።”

በሉ ሁላችንም እንነሳ ሰዎች እንዲመሩ ሰበብ ለመሆን እና ነፍሶችን ለማዳን እንቁም! የዘነጋን ለማስታወስ፣ የተደናገረን ለመምራት፣ የጠመመን ለማቅናት፣ የተኛን ለማንቃት… እንነሳ!

ከቅርብ ዘመዶቻችን እጀምር። የዱንያን ምንነት እናስረዳቸው። እጃቸውን ይዘን ወደ መስጂድ እንውሰዳቸው። በረመዳን ብቻ መስጂድ የሚገቡ ወንድሞችና እህቶችን ትክክለኛው መንገድ ወዴት እንደሆነ እንጠቁማቸው። ይህን የነብዩ (ሰ.ዐ.ወ) ዱዓ ደጋግመን እናድርግ።

“አል-ላሁም-መ ኢጅዐልና ሁዳተን ሙህተዲን” (አላህ ሆይ /ወደ ቀና/ የተመሩና ሰዎችን ወደ ቀና መንገድ የሚመሩ አድርገን።)

የክፍል ሶስት ማጠቃለያ

የእድል ወይም የሰዐዳ መሰረት እና መሽከርከሪያ ምህዳር ሁለት ነገሮች ላይ ይንጠለጠላል፤

  • አላህን በኢኽላስ በማምለክና
  • ለፍጡራን መልካም በመዋል።

የበጎ አድራጎት በሮች ሰፊ ናቸው። ዋናው ነገር በልብ ተነሳሽነት እና በትጋት ተግባር ላይ መሳተፍ ነው። በተለይም ረመዳን በጎ አድራጎትን ለመልመድ መልካም አጋጣሚ ነውና ይህን ወርቃማ ጊዜ እንጠቀምበት።

ከላይ የጠቀስናቸው ጥቂት የበጎ አድራጎት ደጃፎች ናቸው።

ለትዳር አጋር መልካም መዋል፣ ልጆችን ማስደሰትና መንፈሳዊ ህይወታቸውን መከታተል… ከጠቀስናቸው ውስጥ ናቸው። በየቀኑ ከቤተሰቦች ጋር የሚደረግ ስብሰባ ይህን ሊያሳካ እንደሚችል ዘክረናል።

ዝምድናን መቀጠል፣ ምግብ ማብላት፣ ስጦታ ማብዛት፣ የሰዎችን ጉዳይ መፈፀም፣ ሰዎችን ማስታረቅ… የጠቀስናቸው የበጎ አድራጎት ደጃፎች ናቸው። ኑ በነዚህ ደጃፎች ወደ አላህ እንግባ!!!

ምክራችን

በመጨረሻም እነዚህ ተግባሮች ለመፈፀም ሁላችንም ለነፍሳችን ቃል እንድንገባ እንጠይቃለን። አላህ እንዲህ ብሏል፡-

إِن يَعْلَمِ اللَّهُ فِي قُلُوبِكُمْ خَيْرًا يُؤْتِكُمْ خَيْرًا

“አላህ በልቦቻችሁ ውስጥ በጎን ነገር ቢያውቅ የተሻለን ይሰጣችኋል።” (አል-አንፋል 8፤ 70)

የአላህ መልእክተኛ (ሰ.ዐ.ወ) “…መልካምን አጥብቆ የሚሻ ሰው አላህ ይሠጠዋል።”

ምናልባት አላህ እውነተኛ ፍላጎታችንን አይቶ ከፍላጎታችን ጫፍ ያደርሰን ይሆናል። ልመናችንንም ያሟላልናል። “ስጦታ የሚሰጠው በዝግጅታችን መጠን ነው!”

ነፍስ ታካች ናት። እረፍት በሰጠሀት ቁጥር ጨምርልኝ ትላለች። የረመዳን ወር በቁጥር የሚለኩ ሰዓታት ድምር ነው። ስለዚህ ያሳለፍናቸውን ተግባራት ለመፈፀም ለነፍስህ በነፍስህ ላይ ቃልን ያዝ። ቃልህንም አጥብቀው። ከአላህ እርዳታ ለምን። እንዲቀበልህም ተማፀን።

እነዚህን ምክሮች ለሁላችን፡-

  1. የቀን እንቅልፍ እንቀንሳለን።
  2. ምግብና መጠጥ እንቀንሳለን።
  3. ንግግርና ሳቅ አናበዛም።
  4. ቁርአንን ማስተንተንና በዘነጋ መንፈስ ያነበብነውን መድገም።
  5. ቢያንስ በቀን ሃያ ጊዜ ሞትን ማስታወስ አለብን።
  6. መስጂድ ውስጥ ብዙ መቆየት መልካም ነው።
  7. በጊዜ ወደ ጀመዐ ሶላት መሄድ እናዘውትር።
  8. ቤታችን የሚመች ከሆነ ለሚስትና ለልጆች የሚሆን የመስገጃ ስፍራ (መስጊድ) እንወስን።
  9. በየቀኑ ከትዳር አጋር እና ከልጆች ጋር የሚደረግ ለክትትልና ለንባብ የሚሆን ፕሮግራም እንወስን።
  10. ከፈጅር በፊት ተነስተን ተሀጁድ መስገድ፣ ዱዐ እና ኢስቲግፋር ማብዛት አለብን።
  11. ምርጥ ወቅቶችን መጠቀም አለብን። በእንቅልፍና መሰል ነገሮች ማባከን የለብንም።
  12. ልባችንን ሰብስበን ዱዐ ማብዛት አለብን። በተለይም ለዱዐ የተመረጡ ወቅቶችን አጥብቀን እንያዝ!
  13. ቤታችን ውስጥ ሶደቃችንን የምናጠራቅምበት ሳጥን እናስቀምጥ እና ውስጡ ላይ የየቀን ሶደቃችንን እንክተት።
  14. ዚክራችንን ከፊክር ጋር እናቆራኝ። የምንሰራቸውን ዒባዳዎችና በጎ ሥራዎች ከኢኽላስ ጋር እናስተሳስር።
  15. በቀን ለአንድ ሰዐትም እንኳን ቢሆን ኢዕቲካፍ እናድርግ። የመጨረሻዎቹን አስር ቀናት ደግሞ ጠቅልለን እንድንገባ አደራ።
  16. በተለያዩ ጉዳዮች ላይ ስለፈፀምነው ኃጢያት እና ስህተት ነፍሳችንን መተሳሰብ አለብን።
  17. በጎሥራዎችን ማብዛት አለብን።
  18. ለወዳጆቻችንና ለሚስኪኖች ምግብ ማብላት አለብን።
  19. ለሙስሊሞች ጉዳይ መሯሯጥ አለብን።
  20. የበደለንን ይቅር ማለት እና ልባችንን ማስፋት አለብን።
  21. ወደ አላህ መንገድ ሠዎችን መጥራት አለብን።

በመጨረሻ፡-

ውድ አንባቢዎች! ሁላችንም የተለያየ ሁኔታ ላይ የምንኖር ሠዎች ነን። በድንገት ረመዳን ወጥቶብን ግራ እንዳንጋባ የየቀን ፕግራሞቻችንን አሁኑኑ አውጥተን እናጠናቅቅ። ፕግራማችንንም እንደ አቅማችን ያለፉትን ተግባራት በሙሉ ያካተተ እናድርገው። መልካም ረመዳን!! አላሁመ ባሪክ ለና ፊ ረመዳን!!

*****

LEAVE A REPLY